పులిమీద స్వారీ – కేరళ హెచ్చరిక (శనివారం నవీనమ్)

0
488
A truck carries people past a flooded road in Thrissur, in the southern Indian state of Kerala, Saturday, Aug. 18, 2018. Rescuers used helicopters and boats on Friday to evacuate thousands of people stranded on their rooftops following unprecedented flooding in the southern Indian state of Kerala that killed hundreds, officials said. (AP Photo)

పులిమీద స్వారీ – కేరళ హెచ్చరిక

(శనివారం నవీనమ్)

ఉపద్రవం వచ్చిందని వైరాగ్యాన్ని తెచ్చుకోవడం కాదు. ప్రతీసారీ మరచిపోతున్న ఒక సత్యాన్ని మళ్ళీ గుర్తు తెచ్చుకోడానికి ఇది ఒక సమయం…ప్రకృతిని ధిక్కరించి, పర్యావరణాన్ని ధ్వంసం చేసే “పులిమీద స్వారీ” నుంచి వొడుపుగా దిగిపోవాలన్న ఆలోచనకు ఇది ఒక సందర్భం… 

ప్రకృతితో జీవించే సహజత్వాన్ని వొదిలేసి ప్రకృతిని లొంగదీసుకుంటున్నామన్న సుదీర్ఘ  “అభివృద్ధి” ప్రయాణంలో మనుషుల చర్యలు, ప్రకృతి ప్రతిచర్యలు పరస్పరం శతృపూరితంగానే వుంటాయి.  

మనిషి వివేకమైనా గెలవాలి…ప్రకృతే ప్రళయమై ముగింపైనా ప్రకటించాలి…ఈ లోగా లాటూర్ భూకంపాల మెదలు కేరళ వానలవరకూ ప్రకృతి  వేసే జరిమానాలలో కొన్ని ప్రాణాలు కొట్టుకుపోక తప్పదు.

భారీ వర్షాలు, వరదల తాకిడికి కేరళలో దాదాపు 500 మంది చనిపోయారు, 15 లక్షల మంది ప్రజలు నిరాశ్రయులయ్యారు. సగం రాష్ట్రం వాన, వరదల దెబ్బతిన్నది. 30వేల కోట్ల రూపాయల పబ్లిక్ ఆస్తులు దెబ్బతిన్నాయు. ప్రయివేట్ ఆస్ధుల నష్టం ఇందుకు ఏడెనిమిది రెట్లు వుంటుంది.

నాగరికత, విద్య, సేవారంగాల్లో, ప్రగతిశీల భావాలతో దేశానికి ఆదర్శంగా ఉన్న కేరళ సైతం ప్రకృతి వైపరీత్యానికి తలవంచక తప్పలేదు. కేరళ వైపరీత్యానికి ప్రస్తుత ప్రభుత్వం మాత్రమే కారణం కాదు. గత 50 ఏళ్లుగా పర్యావరణ పరిరక్షణ పట్ల ప్రభుత్వాలు శ్రద్ధ వహించకపోవడమే ఈ తప్పుకి మూలం.

కేరళలో ప్రకృతి విలయం నేపథ్యంలో గాడ్గిల్ నివేదిక మరోసారి ప్రస్తావనకు వచ్చింది. పర్యావరణ వేత్త మాధవ్ గాడ్గిల్  పశ్చిమ కనుమల పరిరక్షణపై 2011లో నివేదిక ఇచ్చారు. పర్యావరణం, జీవ వైవిధ్యం పరిరక్షణకు చర్యలు తీసుకోకపోతే కేరళలో ప్రకృతి విపత్తులు తప్పవని ఆయన హెచ్చరించారు. పశ్చిమ కనుమలు మహారాష్టకు కూడా విస్తరించి ఉన్నాయి. పశ్చిమ తీరంలో ఉన్న కేరళ, కర్నాటక, మహారాష్ట లు గాడ్గిల్ నివేదికను అమలు చేసి ఉంటే ఇంత బీభత్సం జరిగి ఉండేది కాదని నిపుణులు అంటున్నారు. 

పర్యావరణ పరిరక్షణ నిమిత్తం పశ్చిమ కనుమలకు ఆ నివేదికలో హద్దులను కూడా నిర్ణయించారు. 1,29,037 చదరపు కి.మీ విస్తీర్ణంలో పశ్చిమ కనుమలు ఉన్నాయి. తమిళనాడులో 210 కి.మీ, మహారాష్టల్రో 48 కి.మీ వెడల్పున ఈ కనుమలు విస్తరించి ఉన్నాయి. 1,490 కి.మీ పొడువున ఉత్తరం నుంచి దక్షిణం వైపు ఇవి విస్తరించాయి. ఈ మొత్తం ప్రదేశాన్ని ‘ ఎన్విరాన్ మెంటల్ సెన్సిటివ్ జోన్ ’గా (ఈఎస్‌జడ్) ప్రకటించాలని గాడ్గిల్ సిఫార్సు చేశారు. వీటిని మూడు జోన్లుగా విభజించాలన్నారు. వీటిని 2200 గ్రిడ్స్‌గా వర్గీకరించాలి. ఈ ప్రాంతంలో వ్యవసాయాన్ని నిషేధించాలి. మూడేళ్లలో ప్లాస్టిక్ బ్యాగ్‌లను నిషేధించాలి. పశ్చిమకనుమలు, వాటి పరిసరాల్లో ప్రత్యేక ఆర్థిక మండళ్లు, హిల్ స్టేషన్ల ఏర్పాటుకు అనుమతించరాదు. ప్రభుత్వ భూముల్ని ప్రైవేట్ భూములుగా మార్చేందుకు అనుమతులు ఇవ్వరాదు. అటవీ ప్రాంతాలను ఇతర ప్రాంతాలుగా మార్చే ప్రతిపాదనలను తిరస్కరించాలి. ఈఎస్‌జడ్‌లలో మైనింగ్ లీజులు ఇవ్వరాదు. ఇప్పటికే మైనింగ్ లీజులు ఇచ్చి ఉంటే సమీక్షించాలి. కొత్తగా డ్యాంలు, థర్మల్ విద్యుత్ ప్రాజెక్టులకు అనుమతులు ఇవ్వరాదు. కాలుష్యకారక పరిశ్రమలను అడుగుపెట్టనివ్వరాదు. వచ్చే ఎనిమిదేళ్లలోగా దశల వారీగా రసాయనిక పరిశ్రమలను తరలించాలి.

గాడ్గిల్ కమిటీ నివేదికను ఆరు రాష్ట్రాలు అంగీకరించలేదు. 

ఈ కమిటీ సిఫార్సులను పరిశీలించి మరో నివేదిక ఇచ్చేందుకు కస్తూరిరంగన్ కమిటీని నియమించారు. ఈ కమిటీ 60 శాతం పశ్చిమ కనుమలను ‘కల్చరల్ ల్యాండ్ స్కేప్’గా గుర్తించింది. ఇక్కడ మానవ ఆవాసాలు, వ్యవసాయం, మొక్కల పెంపకం ఉన్నాయని తేల్చింది. మిగిలిన ప్రాంతం ప్రకృతి సహజ వనరులు, అందాలతో అలరారుతోందని పేర్కొంది. ఈ భాగం 60 వేల చదరపు కి.మీ మేరకు విస్తరించి ఉన్నాయి. ఈ ప్రాంతంలో మైనింగ్, ఇసుక తవ్వకాలను నిషేధించాలని, థర్మల్ ప్లాంట్ల నిర్మాణాలను అనుమతించరాదని, కాలుష్య పరిశ్రమలను అడుగుపెట్టనివ్వరాదని, టౌన్‌షిప్‌లను నిషేధించాలని పేర్కొంది. 

గత ఏడాది కేంద్ర పర్యావరణ మంత్రిత్వ శాఖ 56,285 చదరపు కి.మీ ప్రాంతం పర్యావరణ పరంగా సెన్సిటివ్ ఏరియాగా ప్రకటించింది. ఇందులో 13,108 కి.మీ కేరళ పరిధిలో ఉండాలని కస్తూరి రంగన్ కమిటీ సిఫార్సు చేస్తే, దీని పరిధిని కేరళలో 9377 చ.కిమీ పరిధికి కుదించారు. అయితే నివేదికలో ఒక్క సిఫార్సు కూడా ఇంతవరకూ అమలవ్వలేదు.

ఇపుడు కేరళ రాష్ట్రమే పర్యావరణ రంగంలో దేశానికి కొత్త పాఠాలు నేర్పుతుంది. మన దేశంలో తుపానులు, భారీ వర్షాలకు తరచుగా నష్టపోయే రాష్ట్రాల్లో ఆంధ్రప్రదేశ్ అగ్ర స్థానంలో ఉంది. ఒడిశా, తమిళనాడు, పశ్చిమబెంగాల్ ఏటా తుపాన్లకు దెబ్బతింటున్నాయి. చెన్నై, ముంబయి నగరాల్లో వరద బీభత్సం పెను నష్టాలను మిగిల్చింది. 2013లోఉత్తరాఖండ్ అతలాకుతలమైంది. 2015లో  విశాఖపట్నం హుదూద్ తుపానుకు తీవ్రంగా నష్టపోయింది. ప్రకృతి విపత్తులు జరిగినపుడే పర్యావరణ పరిరక్షణ గురించి మాట్లాడుతుంటాం. ఆ తర్వాత ఆ ఊసే ఉండదు. 1977 నాటి ఉప్పెనతో దివిసీమ తీవ్రంగా దెబ్బతింది. 1996లో పెనుతుపాను తాకిడికి కోనసీమ తీవ్రంగా నష్టపోయింది.

దేశంలో 7013 కి.మీ తీరం వుండగా ‘నేషనల్ సెంటర్ ఫర్ కోస్టల్ రీసెర్చి’ సంస్ధ కొంతకాలం క్రితం 6031 కి.మీ పొడవునా సర్వే చేసింది .  ఆ సర్వే ప్రకారం 33 శాతం సముద్ర తీర ప్రాంతం కోతకు గురైంది. 29 శాతం మేర భూభాగంలో ఇసుక మేటలు వేసింది. కేరళలో కోస్తా తీరం 40 శాతం మేర కోతకు గురైంది. ఆంధ్రాలో 27 శాతం కోస్తా తీరం కోతకు గురైంది. 

తీర ప్రాంతాల్లో భారీ నిర్మాణాలు, సముద్రంలో నదులు కలిసే చోట మడ అడవులు తగ్గడం వల్ల భూమి కోత పెరుగుతోంది. దీని వల్ల కెరటాలు తీవ్రమై, సముద్ర మట్టం పెరుగుతోంది. అరేబియా సముద్రంతో పోల్చితే బంగాళాఖాతంలో కల్లోలం ఎక్కువ. అందుకే మన కోస్తా తీరం వేగంగా కోతకు గురవుతోంది. నదీ తీరాలను, సముద్ర తీరాలను పరిరక్షించుకునేందుకు పర్యావరణ నిపుణులు ఎన్నో సిఫార్సులు చేశారు. ప్లాస్టిక్ వాడకం తగ్గించలేకపోతున్నాం. తీరం వెంబడి హోటళ్లు, వైన్‌షాపుల్లో ప్లాస్టిక్ గ్లాస్ వాడకాన్ని నిషేధించాలన్న స్పృహ ప్రభుత్వాలకు వుండటంలేదు. అధికార పార్టీల నాయకులు కార్యకర్తల చేతుల్లోనే ఈ వ్యాపారాలు వుండటం పర్యావరణానికి పెద్ద ప్రతికూలమౌతోంది. జనం భాగస్వామ్యం, పాలకుల్లో చిత్తశుద్ధి లేనపుడు ఏదీ సాధ్యం కాదు.

గోదావరి నదిపై లాంచీల్లో ప్లాస్టిక్ గ్లాసులు, సీసాల వాడకం నిషేధించాలి. గోదావరి లంకల నిండా వాడిపారేసిన ప్లాస్టిక్ గ్లాసులు, సీసాలే దర్శనమిస్తాయి. వారణాసి, పాట్నా ప్రాంతాల్లో వలే- మట్టి పిడతల్లో టీ, ఇతర పానీయాలను సరఫరా చేయాలి. సాధారణ సమయాల్లో పర్యావరణ పరిరక్షణకు తగు జాగ్రత్తలు తీసుకుంటే- వరదలు, భారీ వర్షాలు వచ్చినప్పుడు వాటి తీవ్రత అంతగా ఉండదు. ప్రకృతిని ఎవరూ నియంత్రించలేరు. కానీ, నష్టాన్ని తగ్గించేందుకు పకడ్బందీ చర్యలు తీసుకోవచ్చు. కాగా, కేరళలో ప్రకృతి విపత్తుకు కొందరు మత విశ్వాసాలకు ముడిపెట్టడం మూర్ఖత్వం.

LEAVE A REPLY

Please enter your comment!
Please enter your name here